पोलिसांचा
धर्म म्हणजे ‘ड्यूटी’...
दाभोलकर, पोलीस, बिरादरी
चळवळीमध्ये मदतीला उभी राहतात आणि विचारांच्या प्रेमापोटी मदतही
करतात, ती आपली माणसं. तीच आपली
बिरादरी. डाव्या चळवळीतील व्यक्ती यामध्ये भेटाव्यात, यात नवल नाही. परंतु समाजाच्या
अन्य घटकात; विशेषत:
चळवळीला उपयोगी पडणाऱ्या समाजघटकात ही बिरादरी आढळली की, आनंद होतो, आधारही वाटतो.
सिंधुदुर्ग जिल्ह्याचे जिल्हा पोलीसप्रमुख भारती दलबीरसिंग यांच्याकडून
अनपेक्षितपणे हा सुखद धक्का मिळाला. सिंधुदुर्ग जिल्ह्यातील सत्यशोध प्रज्ञा परीक्षेच्या
प्रशिक्षण शिबिराच्या समारोपाला ते आले होते. वयाने अगदी तरुण असलेल्या त्यांनी जे
स्वत:चे अनुभव सांगितले, त्यावरून
ते चळवळीचे उत्तम मित्र आहेत, याची
खात्रीच पटली.
लहानपणी एकदा त्यांच्याकडून उपवास लक्षात न राहिल्याने मोडला गेला.
स्वाभाविकच आई रागावली. त्यांनी आईला प्रतिप्रश्न केला, ‘मी विसरलो हे खरेच; पण मग देवाने मला उपवासाची आठवण का करून दिली नाही?’
जिल्हा पोलीसप्रमुख झाल्यावर त्यांनी जिल्ह्यातील पोलीस ठाण्यांना
भेट देण्यास सुरुवात केली. पोलीस स्टेशनच्या ज्या इमारती असत, त्यामध्येच अंतर्गत पुनर्रचना करून अधिक
चांगल्या सोयी कशा देता येतील, हे
ते पाहू लागले. एका पोलीस स्टेशनला त्यांनी बैठक व्यवस्थेत काही बदल सुचविले. तेथील
हाताखालचे अधिकारी एकदम गप्प झाले आणि नंतर म्हणाले, ‘असे करणे शक्यच नाही. या नव्या मांडणीत गावच्या देवाकडे आमची पाठ
येते. त्यामुळे गुन्हे वाढतात. तसेच गुन्हेगार सापडतही नाहीत.’ शेवटी ‘काय होईल ते पाहता येईल, मी सांगतो तसे करा,’ असा आदेश पोलीसप्रमुखांना द्यावा लागला.
दुसऱ्या एका पोलीस स्टेशनच्या आवारात देऊळच
बांधलेले होते. त्याबाबत दलबीरसिंग यांनी स्पष्ट विरोध दर्शविला. एके ठिकाणी पोलीस
प्रशिक्षण केंद्रात महिला कर्मचाऱ्यांची सोय असलेल्या वसतिगृहातील महिला पोलीस श्री.
भारती यांच्याकडे आल्या आणि त्यांना वसतिगृहात अनेकजण आजारी पडत असल्यामुळे सत्यनारायणाची
महापूजा घालण्याची विनंती केली.
जिल्हा पोलीस प्रमुखांनी ती साफ नाकारली. या स्वरुपाची अनेक उदाहरणे आपल्या भाषणात
त्यांनी दिली. समितीच्या कार्याला सर्व मदत करण्याचे आश्वासनही दिले. वर ते म्हणाले,
‘हे पाहा, तुमचे काम आमच्या फायद्याचेच आहे. पोलिसांचे
काम अंधश्रद्धेमुळे कितीतरी वाढते. बाबरी मशीद जमीनदोस्त केली हा अंधश्रद्धेचाच प्रकार.
पण पोलिसांच्यावर त्यामुळे किती प्रचंड ताण आला.’ पुढे म्हणाले,
‘पोलिसांचा धर्म एकच आणि तो म्हणजे त्याची
ड्यूटी. बाकीचे धर्म त्याच्या घरी.’ या भारतदेशी असे काही समंजस आणि आग्रही
‘भारती’ मिळाले, तर अंधश्रद्धा निर्मूलनाच्या कार्याला केवढा
तरी जोम प्राप्त होईल.
अंधश्रद्धा
निर्मूलन वार्तापत्र
(जानेवारी १९९६)
कोणत्याही टिप्पण्‍या नाहीत:
टिप्पणी पोस्ट करा